مباديء الإسعافات الأولية

 

قبل ما تنزل مظاهرة ويحصل فيها اشتباكات وإصابات وقبل ما تشيل مصاب وتجري بيه عشان تسعفه خد بالك الأول :-


-   ما تحاولش تعمل أي حاجة إنت مش متدرب عليها .. استعين بأي حد من اللي حواليك يكون عنده خبرة. 


-   ما تنقلش المصاب من مكانه إلا في حالة وجود خطر مباشر على حياته أو حياتك ، نقله بطريقة غلط ممكن يتسبب في وفاته .


-   اتأكد إن مفيش حاجة في فم المصاب بتسد الممر الهوائي وتأكد إنه بيتنفس قبل ما تحركه ، ولو بيتكلم أو واعي يبقى ممر الهواء مفتوح .


-   لو هتشيل المصاب لازم يتشال كله ككتلة واحدة يعني حافظ على استقامة ظهره وعنقه وباقي أجزاؤه قدر الإمكان ، ياريت لو أكثر من واحد يشيلوه وكإنه على نقالة ، ما تشيلوش من أطرافه الأربعة .


alt


 

alt

-  أي كسر في العمود الفقري بيعتبر خطر جدا وممنوع تحريك المصاب إلا من مسعفي الإسعاف ، لإن الحركة ممكن تؤدي لإصابة النخاع الشوكي وبالتالي شلل دائم .. في الحالة دي المسعفين لازم يكون عددهم أربعة ، واحد يسند الرأس والباقيين الجسم .


-  لو في نزيف شديد حاول توقف النزيف بسرعة قبل أي حاجة ، اضغط مباشرة على مكان النزيف برباط ضاغط أو أي حاجة في إيدك تلاقيها ، أو اخلع جاكيت أو قميص عنك واستخدمه .. وده بينطبق على النزيف الناتج عن إصابات الطلق الناري والخرطوش .

alt


 

-  لو النزيف في الساق أو الذراع  يبقى خليه مرفوع فوق مستوى القلب عشان تقلل النزيف .

alt


-  لو النزيف مستمر اربط عليه رباط كمان فوق القديم وشده ( ما تشيلش القديم أبدا ) 

ملحوظة :- اوعى تكون بتسعف مريض والجوانتي أو إيدك مليانة دم منه وتروح تسعف مريض تاني والدم لسه في 

إيدك !! إنت كده بتنقل دم من انسان لآخر وإنت مش عارف إن كان مريض ولا لأ .. لازم تغسل إيدك كويس جدا 

وتعقمها كمان .

بس خلي بالك

   اتطمن كل شوية على أطراف المصاب ( إيده ورجله ) لازم تكون دافئة أو حرارتها طبيعية ويقدر يحركها ، لو باردة لازم تخفف الرباط شوية عشان تسمح للدم يوصل للأطراف ، لحد ما يوصل للمستشفى .

-  لو شكيت إن النزيف معاه كسر في مكان ما ، خفف ضغط الرباط على المكان المكسور بس ، لكن خلي الرباط عليه كنوع من الجبيرة لحين تجبيسه في المستشفى . 


- بالنسبة لإختناقات الغاز .. اخلط ابيكو جل بتاع الحموضة بضعفه مياه واغسل بيه عين المصاب ووجهه ، ولو متاح

 عندك إديله Hydrosafe عشان بيخفف ألم العضلات وبيظبط كيميا الجسم اللى اتأثرت من الغاز ، كمان البيبسي

 بيخفف آلام الوجه لو غسلته بيه وأحيانا بينهيها تماما لكن نبه المصاب إنه لو هيرجع للإشتباكات تاني فالبيبسي

 هيسبب ضرر أكثر لو اتعرض بعده للغاز ، ولو الأنف بينزل منها مخاط  إسود لازم المصاب يروح المستشفى

 فورا لإن ده معناه إن الرئة مصابة وممكن تحصل فيها جلطات ،، اللبن وأقراص فيتامين سي وأقراص الفحم كل 

 دي مفيدة في تقليل آثار الغاز الضارة وامتصاصه من المعدة ..ولو في أي جروح اغسلها فورا بماء بارد قبل ما 

 المسام تتفتح وتمتص الغاز .. وممنوع إستخدام موسع الشعب الهوائية ( broncho dilators ) إلا لو متأكد

100% إنه مش هيرجع الإشتباكات .

الفيديو ده مفيد جدا في التعامل مع الغاز .. راجعوه كويس 

  

 
 
 


   إذا حصل إغماء بسبب استنشاق كمية كبيرة من الغاز أو لأي سبب تاني ، في الحالة دي تجنب إنك تخلي المصاب فاقد الوعي على ظهره لإن ده هيصعب عليه عملية التنفس أكثر ، حاول تخليه على جنبه اليمين أو الشمال وخبط خبطات خفيفة على ظهره ، حاول توفر له مكان في هواء نظيف ومفتوح ، ولو في أي حاجة  ضيقة حول الرقبة أو الصدر فكها عنه ، لحين وصول الإسعاف .

بالنسبة لضربات الشمس  دي بتسبب ارتفاع في درجة الحرارة لفوق 40 ، وصداع ودوخة وصعوبة في التنفس

وارتفاع الضغط في المرحلة الأولى ثم انخفاضه في المرحلة التانية .. طيب نعمل إيه ؟ 

انقل المصاب فورا لمكان ظل بعيد عن الشمس ، خلي رأسه مرفوعة عن مستوى جسمه ، وفورا اعمل كمادات مية 

باردة على الرأس والأطراف ولو متاح لف جسمه بفوط مبلولة مية ورشها كل شوية بحيث تحافظ عليها باردة وانقله 

لأقرب مستشفى فورا أو المستشفى الميداني .


 



- حاجة كمان مهمة جدا عشان الطفل اللي اتصاب بكسر في الجمجمة يوم 19 إبريل ،

alt


ازاي تعرف إن في كسر حصل ؟ العلامة الوحيدة اللي هتشوفها بعينك وتخليك متأكد من وجود كسر هي انخفاض واضح لجزء من الجمجمة ..... غير كده ممكن تلاقي نزيف من الأذن أو الأنف أو حول العين ، تعثر في الكلام ، غثيان وقيء ، صعوبة في الرؤية ، فقدان وعي ، نزول سوائل عديمة اللون من الأنف أو الأذن ... دي كلها أعراض كسر الجمجمة وبتختلف حسب شدة الحالة ,, طيب نعمل إيه ؟؟  نطلب الإسعاف فورا ثم :- 

أولا : اتأكد إن المصاب بيتنفس وحاول توفر له تهوية جيدة قدر الإمكان ...

ثانيا .. ما تحاولش تحرك رأسه أو تلمس المكان المصاب بإيدك أو بأي آلة حادة إلا لو في حالة حدوث نزيف شديد مع الكسر حاول توقف النزيف بوضع قطعة قماش على المكان وما تشيلهاش أبدا ... 

ثالثا .. في حالة حدوث قيء مع كسر الجمجمة حاول تثبت رأس المصاب ورقبته على الجنب عشان ما تحصلش ( شرقة ) من القيء وبالتالي الإضرار بالتنفس ...

         

 ملحوظة :- أنا كتبت الإسعافات الأولية للإصابات المحتملة في الاشتباكات ، لو أي حد شايف إن في إصابات تانية بتتكرر يقوللي عليها عشان أضيف طريقة إسعافها .. يمكن يكون سبب في إنقاذ حياة .

 @horreiia 

التعليقات
  • كتب من طرف ميار:

    لو فيه خرطوش مثلا اطلعه إزاي و لو جرح محتاج خياطه , و لو كسر في الايد او الرجل اعمل ايه مؤقتا

التعليقات

إضافة تعليق

البحث
آخر التدوينات
إعلان
التقويم
« أكتوبر 2017 »
إث ث أر خ ج س أح
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31          
التغذية الإخبارية